Путин Қытайға жымиып барып, күлімдеп қайтты

АҚШ президенті Дональд Трамптың Қытайға жасаған сапарынан соң бір апта өтпей жатып, Бейжіңге Ресей президенті Владимир Путин барды. Трамптан кейін іле-шала Путинді қабылдаған Си Цзиньпин Еуропа жетекшілерінің Украина соғысын тоқтатуға қатысты үкілі үмітін ақтамады. Сондай-ақ, бұл кездесуде Путин мен Си «әлем үстемдік құрған бір ел мен бір топтың басқаруынан кетіп, көпполярлы басқару жүйесіне өткені» жайында декларацияны қабылдады. Бұл декларация - екі диктатор әйтеуір бір келісімге қол қою керек болған соң қойылған бос қағаз деп жатқандар бар.