Украинамен соғысқа баруға келіспесе, түрмеге қамалатынын айтып қорқытқан

Желіде бір топ қазақ жігіт Ресейде соғысқа әкеткелі жатқанын айтып, Тоқаев пен ел билігінен көмек сұрады. Олар Ресейге күзетші болып жұмыс істеуге барып, алданып қалғандарын айтады. Жігіттерді келісім-шарт жасауға мәжбүрлеп, құжатқа қол қойдырған. Украинамен соғысқа баруға келіспесе, түрмеге қамалатынын айтып қорқытқан. «Құдай сақтасын, бірақ не болса да, басқа елде соғысқанша, өз жерімізде өлген жақсы», — дейді видеода жігіттердің бірі. Алданған жігіттердің арасында 19 жастағы Айнабек бар. Ол әпкесіне Украинаның Луганск қаласында екенін айтып, елге қайтуға көмек сұраған. Оның сөзінше, сенбі күні жігіттерді соғыс жүріп жатқан аймаққа алып кетеді. Сол үшін ол тез арада жедел әрекет етуді өтінген. Айнабектің жақындары құзырлы органдарға жүгініп, президенттен көмек сұрады. Сыртқы істер министрлігі Ресейге дипломатиялық нота жолдағанын мәлімдеп, «нәтижесін күтсін» деген. Еске салсақ, Ресей 2022 жылы Украинаға басып кіргеннен кейін Өзбекстан, Қазақстан, Қырғызстан азаматтарын белсенді түрде соғысқа тартып келеді. Жұмыс не жоғары жалақы уәде етіп шақырады да, кейін Ресей әскеріне мәжбүрлі түрде қосады. Украиндық «Хочу жить» жобасының мәліметінше, Ресей жағында мыңнан аса Қазақстан азаматы соғысып жатыр. Олардың кемінде 200-і қаза болған не із-түссіз жоғалған. видео: symbat_erkinbek / IG