Жахиннің соты жабық өтті. Оның үкімі де құпия оқылды.

10 маусым күні Көкшетауда сот тіркелмеген саяси оппозициялық «Алға, Қазақстан» партиясының лидерінің бірі Амангелді Жахинді 7 жылға бас бостандығынан айырды. Амангелді Жахинге де партия жетекшісі Марат Жыланбаев тәрізді «тыйым салынған ұйым қызметіне араласты» және «экстремистік ұйымды қаржыландырды» деген айыптар тағылған. Жахиннің соты жабық өтті. Оның үкімі де құпия оқылды. Адвокаттың сөзінше, қылмыстық баптарға сәйкес Амангелді Жахиннің мүлкін тәркілеуі мүмкін. Кеше, 9 маусымда өткен сот отырысында прокурор оған 8 жыл сұраған. Амангелді Жахин өзіне тағылған айыптарды мойындаған жоқ. 62 жастағы Амангелді Жахин — жай белсенді емес. Ол өткір позициясымен, саяси, демократиялық реформаларды қолдаған позициясымен танымал. Ол «Алға Қазақстан» партиясын құру бастамасын белсене қолдап, Марат Жыланбаевпен партияны ресми тіркеуге тырысты, азаматтардың саясатқа белсене араласуы құқығын барынша қорғады. Құқық қорғаушылар оның үкімінің артында биліктің саяси қудалауы тұр деп санайды.