2026 ж. 1 шілде

30 маусымда тіркелмеген «Алға, Қазақстан» белсенділері Степногорскідегі №4 мекемеге барып, Марат Жыланбаевтың хәл-жағдайын білмек болды. Алайда оларды қайтадан кіргізбеді. Тіпті адвокаты Мейіржан Досқараевқа да кездесуге рұқсат бермеген. Колония әкімшілігі кездесу жайлы Марат Жыланбаевтан өтініш түспеді дейді. Мейіржан Досқараев заң бойынша мұндай өтініш талап етілмейтінін, Қазақстан Конституциясына сай әркімге заң көмегін алу құқығына кепілдік берілгенін атап өтті. Еске салсақ, бұған дейін мамырда мекеме аяқ асты карантинге жабылып, ешкімді кіргізбей қойған еді. Марат Жыланбаев аштық жариялаған соң байланысқа 4 қаңтардан бері шықпаған. Содан бері, міне, 7 ай болды, туыстарын да, адвокатын да кездестірмей жатыр. Марат Жыланбаевтың жағдайы туралы ешқандай ақпарат жоқ, ол толық оқшаулауда. Соңғы бір ақпарат бойынша белсендінің денсаулығы күрт нашарлап, ем қажет делінген еді. Марат Жыланбаев — «Алға Қазақстан» партиясының көшбасшысы, супермарафоншы, Гиннестің рекордтар кітабының рекордшысы.