Болған жағдайды видеоға түсіре бастағанда, қолындағы телефонын тартып алған

27 қазан тіркелмеген «Атажұрт» саяси қозғалысының белсендісі Қапар Ахаттың үйіне таң атпастан полиция келіп, телефонын тартып алып кеткен. Бұл туралы белсендінің өзі хабарлады. Оның сөзінше, бүгін «Атажұрттың» бірнеше мүшесін Қазақстандағы Еуропарламент өкілдері кездесуге шақырған. Белсенді полицияның үйіне келуін осы жайтпен байланыстырады. Белсендінің сөзінше, учаскелік полиция өкілдері оның үйіне таңғы он жарымда келген. Бірақ келу себебін ашып түсіндірместен, өздерімен бірге жүруді талап еткен. Қапар Ахат болған жағдайды видеоға түсіре бастағанда, қолындағы телефонын тартып алған. Белсенді мұны бүгін өтуге тиіс Еуропарламент өкілдерімен кездесуге байланысты болуы мүмкін дейді. Енді ол үйінен шығуға қорқып, ешқайда бармай отыр. «Атажұрт» — Қытайдың Шыңжаң аймағындағы этникалық қазақтар мен басқа да түркі тілдес аз ұлт өкілдерінің құқығын қорғаумен айналысатын ұйым. Ол 2017 жылы Қытайдан Қазақстанға көшіп келген қандастардың бастамасымен құрылған. Ұйымның негізін қалаушылардың бірі Серікжан Біләш 2019 жылы ұлтаралық араздықты қоздырды деген айыппен ұсталып, кейін АҚШ кетуге мәжбүр болған. «Атажұрттың» 19 мүшесі қазір түрмеде отыр. Оның 11-іне 5 жылға түрме жазасы, 8 адамға 4 жыл 8 айдан 5 жылға бас бостандығын шектеу жазасы тағайындалған. Оған ұйым мүшелерінің Қытайдың үйрету лагерінде азапталып жатқан қазақтарды босатуды талап етіп, Қытай туы мен Қытай басшысы Си Цзиньпиннің портретін өртеуі себеп болған. Наразылыққа қатысқандарды сот «Ұлтаралық араздықты қоздырды» деп айыптаған.