Жаңаөзен тағы толқып тұр

10 күн бұрын ғана үндеу жасаған «Testcom Ozen» компаниясының жұмысшылары тағы да үндеу жолдады. Мұнай жабдықтарын шығаратын мекеменің 60 жұмысшысы еңбек жағдайын жақсартуды талап етті. Олар «7 күн жұмыс, 7 күн демалыс» ауысымын енгізуді сұрады. 29 қыркүйекте жұмысшылар Маңғыстау облысы әкімі Нұрдәулет Қилыбайға қайырылып, аймақтағы еңбек инспекциясына сенімсіздік білдірді. «Өңірдің бас еңбек инспекторының орнына жауапкершілігі жоғары, еңбекқор және тәртіпті азамат тағайындалсын», — дейді олар. Оған себеп те жоқ емес. Жұмысшылар мұнай бұрғыларын шығарады. Айтуларынша, жақсы жалақы алу үшін айына мұнай айдайтын 12 бұрғы жинап, шығарып үлгеруге тиіс. Бес күн жұмыс істеп, екі күн демалады. Бірақ жұмысшылар бұл толыққанды демалыс үшін өте тиімсіз екенін айтады. «Жұмыс ауыр, өндіріс түтініне бас ауырып, ішкен-жегенімізді құсамыз, бүйрек, бауыр сыр беріп жатыр. 7 күн жұмыс, 7 күн демалысқа ауыссақ, еңбек қабілетін қалпына келтіруге мүмкіндік болар еді», — дейді жұмысшылардың бірі. Олар осы мәселені жұмыс берушіге де, еңбек инспекциясына жеткізген, бірақ ешқандай нәтиже болмаған. Бұл уақытта дәл осы Жаңаөзен қаласында «Өзенмұнайгазға» қызмет көрсететін «ҚазПромТехКомпани» жүргізушілері кешеден бері жұмыс орындарына кіре алмай тұр. Олардың Қасым-Жомарт Тоқаевтан, Ерлан Қариннен көмек сұраған үндеуіне әзірге ешқандай реакция жоқ. «Қазпромтеккомпани» жұмысшылары еңбек шартын жұмыс берушінің бір жақты орындап жатқанын 2024 жылдан бері айтып келеді. Бұған дейін олар 450 мың теңге жалақы алса, енді айлық 300 мың теңгеге түсіп қалмақ. «ҚазПромТехКомпани» мұнайшыларды өндіріс орындарына тасумен айналысады. Ол 2028 жылға дейін тендер ұтып алған. Мекемедегі 34 жүргізуші осы уақытқа дейін күндізгі және түнгі ауысымен жұмыс істеп келген. Ескі УАЗдар айдайтын олар жұмыс жағдайы мүлде жасалмаған айтады. Жұмысшылар еңбек дауын келісім арқылы шешуге тырысқан, бірақ бұл әрекетінен ештеңе шықпаған. Олар айтқанымыздан қайтпаймыз деп тұр. Компания басшылығы жауап бермеді.