Батиха Біләшқызын 25 маусым түнгі 22:00 шамасында күштеп алып кеткен

Түн ортасында үйіне бір топ күштік құрылым өкілі баса-көктеп кіріп, астаң-кестеңің шығарған. Тінтіп, телефоны мен кітаптарын тәркілеп, тартып алған. Серікжан Біләшұлының сөзінше, әпкесі оқиға кезінде 4-5 рет есінен талып қалған. 54 жастағы әйелдің жүрегінде ақау бар, аурушаң кісі, кәмелетке толмаған баласы бар. Серікжан Біләшұлы бұл істі «Атажұрт-пен» байланыстырды. «Қытай мен Қазақстан билігінің ұйымдасқан жоспары. Олардың мақсаты – менен кек алу. Себебі, біз Қытайдың адамзат тарихындағы ең үлкен зұлымдығы – Шыңжаңдағы концлагерь тақырыбын көтердік. Енді бізден, біздің туыстарымыздан кек алмақшы және осы арқылы күресімізді тоқтатуды жоспарлап отыр», – деді ол. Серікжан Біләш – Шыңжаңдағы «саяси түзету лагерлерінде» жазықсыз қамалған қазақтар мен ұйғырлардың құқығын халықаралық деңгейде алғашқылардың бірі болып ашық көтерген белсенді. «Атажұрт еріктілері» ұйымының негізін қалаушы. Ұйым Қытайда қысымға ұшыраған, лагерьлерге қамалған немесе құжаттары тартып алынып, Қазақстандағы туыстарымен байланыса алмай қалған қандастардың құқығын қорғаумен айналысады. Серікжан Біләш белсенділігі үшін Қазақстанда қудалауға тап болып, АҚШ-қа қоныс аударған.