Прокурор «тергеуден жасырынып, қашып кетуі мүмкін» деп өтініш түсірген.

⚡️Бұл туралы адвокат Шынқуат Байжанов хабарлады. Оның сөзінше, прокурор «тергеуден жасырынып, қашып кетуі мүмкін» деп өтініш түсірген. Бәтиқа Біләшті Талдықорғанға алып кеткен болуы мүмкін. Өткен аптада ғана ол қамаудан босатылып, үйқамаққа жіберілген еді. Серікжан Біләштің әпкесінің үстінен он шақты адам «алаяқтық жасады» деп арызданған. Бұған оның ағасына ақша аударуы себеп болды. Шынқуат Байжановтың істің қолдан жасалғанын айтады. Ол мұны Серікжан Біләштің саяси белсенділігін тоқтату мақсатында қысым жасау әрекеті деп бағалады. Еске салсақ, 26 маусымда Бәтиқа Біләшті түн ортасында полиция үйінде тінту жүргізіп, қылмыстық топты ұстағандай күштеп алып кеткен еді. Жасы үлкен әйел қан қысымы көтеріліп, инсульт ала жаздаған. Серікжан Біләш – Шыңжаңдағы «саяси түзету лагерлерінде» жазықсыз қамалған қазақтар мен ұйғырлардың құқығын халықаралық деңгейде алғашқылардың бірі болып ашық көтерген белсенді. «Атажұрт еріктілері» ұйымының негізін қалаушы. Ұйым Қытайда қысымға ұшыраған, лагерьлерге қамалған немесе құжаттары тартып алынып, Қазақстандағы туыстарымен байланыса алмай қалған қандастардың құқығын қорғаумен айналысады. Серікжан Біләш белсенділігі үшін Қазақстанда қудалауға тап болып, АҚШ-қа қоныс аударған.