Бұрын соңды ел алдына шықпаған Дана Медеуова 4 күн бұрын Instagram-да жаңа парақша ашты

Ол желіде алғаш рет Құрылтайдағы жұмысын көрсетті. Медеуова алғашқы жазбасында «депутат болу мен үшін үлкен мәртебе» дейді. 46 жастағы Дана Медеуова – Тоқаевтың туған қарындасы Қарлыға Ізбастинаның және Қазақстанның Болгариядағы бұрынғы елшісі Теміртай Ізбастиннің қызы. Ол биыл «Әділет» партиясынан Құрылтайға депутат болып, Халықаралық істер, қорғаныс және қауіпсіздік комитетінің құрамына кірді. Депутаттар ант бергенде, Тоқаевтың жиенін жақыннан көру мүмкін болмаған еді. Ол ант беріп жатқанда, камера көбіне жалпы залды көрсеткен. Желідегі ақпаратқа сүйенсек, Медеуова саясаттану бойынша докторлық диссертация қорғаған. Абай атындағы ҚазҰПУ-да проректор қызметін атқарып, Кемел Тоқаев атындағы қайырымдылық қорын басқарған. Еске салсақ, Тоқаев президент болғалы биліктегі тамыр-таныстық пен ағайыншылдыққа қарсымын деп, непотизмге тосқауыл қоятынын айтқан. Ол президенттің жақын туыстарына саяси мемлекеттік қызметте және квазимемлекеттік секторда басшылық лауазымдарды иеленуге тыйым салынады деген еді. Туған жиенінің депутат болуына қатысты Тоқаев әлі пікір білдірген жоқ.