Қазақстан азаматтығын ала алмай жүрген қандастар «Қазтест» кемшілігін айтып, шағымын жеткізді

Олар қазақ тілін жетік меңгергеніне қарамастан, тестілеуден өте алмаған. Желіде қандастар мәселесін көтеріп жүрген блогер Думан Бақыткелді бұл орайда жауапты органдарды тестілеу кезіндегі техникалық олқылыққа мән беруге шақырды. Ол соның салдарынан қаншама адам азаматтық ала алмай саңдалып жүргенін айтты. Еске салсақ, Қазақстан азаматтығын немесе тұрақты тұруға рұқсат алу шарттары өзгерді. Енді қандастар Қазақстан азаматтығын алу үшін қазақ тілінен ҚАЗТЕСТ тапсыруға міндетті. Бүған дейін жаңа талап сынға қалған еді. Кирил қарпін меңгермеген қандастар үшін тесттен өту үлкен кедергі туғызуда. Бірақ еңбек министрлігі тест күрделі емес екенін алға тартып, тапсыру қиындық тудырмайды деп сендірген. Ведомство мұны «әлемдік тәжірибе» деді. Биыл 3 335 ұлты қазақ қандас мәртебесін алды. Жыл басынан Қазақстанға келген қандастардың жартысы (47,8%) Қытайдан, 43,6% – Өзбекстаннан, 2,7% – Түрікменстаннан, 2% – Ресейден, 2,2% – Монғолиядан және 1,7 – басқа елдерден келген. Жалпы 1991 жылдан бері 1 млн 168,2 мың қазақ Атамекеніне оралды.