АҚШ журналистері Трампты көрсетуден бас тартып жатыр
Мәселен, кеше Ақ үйде жаңа тікұшақ алаңының ашылу рәсімі өтті. Newsmax тікелей эфир таратты, бірақ онда микрофон болмады да, президент сөзі естілмеді (видео). 18 қыркүйекте Politico, CNN және MS NOW журналистері Ақ үйге кіре алмады. АҚШ президенті Дональд Трамп бұл басылымдар әкімшілік жайлы «өтірік жазады» деп айыптап, аккредитациядан айырды. АҚШ журналистері мұны сөз бостандығына шабуыл деп бағалап, бұл шешімге қарсы сотқа шағым берді. Телеарналар президенттің қатысуымен өтетін шараларды жариялауды, Трампты көрсетуден бас тартты. Наразылық білдіргендер арасында президент сапарынан ресми хабар таратушы Fox News, ABC, CBS және NBC сияқты ірі телеарналар бар. Fox News Трамптың сөзін сөйлеп, ұстанымын жеткізіп жүрген негізгі алаң болған еді. Бойкотқа елдегі өзге де беделді басылымдар қосылды. AP, AFP, Washington Post және The New York Times Дональд Трамптың қатысуымен өткен шаралардан түсірілген суреттерді жариялаудан бас тартқан. Телеарналар Трамптың қатысуымен өтетін шаралардан хабар таратуды тоқтатқан кейін 21 қыркүйекте Trump TV онлайн-арнасы іске қосылды. Оны Ақ үйдің ютуб-арнасынан көруге болады. Трамптың өзі туиттерде «сөз бостандығы бұзылды» дегенді жоққа шығарып отыр. Ол мұны ұлттық қауіпсіздікпен байланыстырып, «жалған ақпаратқа қарсы әрекет» деп түсіндірді. Еске салсақ, Қазақстанда Ақордаға, Үкіметке не Парламентке кіруге аккредитациясы бар кез келген БАҚ-қа рұқсат бар. Бірақ іс жүзінде мемлекеттік медианы есепке алмағанда, тәуелсіз БАҚ үшін кедергілер көп. Мәселен, «Азаттық» радиосының тілшілері бірнеше жылдан бері тұрақты аккредитацияны ала алмай келеді.