Гүлназ Серікбаева — кәмелетке толмаған ұлы мен 70 жастағы қарт анасының жалғыз асыраушысы

Қызылордада «Атажұрт» белсендісі Гүлназ Серікбаеваның соты өтіп жатыр. Сотқа арнайы барған жақтастарының бірі Нұрсан Әсен сот 2 шілдеге қалдырылғанын хабарлады. Оның сөзінше, белсендінің үстінен 2022-2023 жылғы Facebook-тағы жазбалары үшін қылмыстық іс қозғалған. Гүлназ Серікбаева онда Украинадағы Ресей басқыншылығы, Қытаймен визасыз режим және ондағы заңсыз қудалау туралы өз ой-пікірін жазған. «Бұл белсенділерді кез келген уақытта қамаймын десе, ойына келген іспенен, сонау кезінде жазған жазбаларын алып-шығып, істі қылмақ. Бұл масқара жағдай», — деді Нұрсан Әсен соттан шыққан соң. Гүлназ Серікбаева — кәмелетке толмаған ұлы мен 70 жастағы қарт анасының жалғыз асыраушысы. 11 наурызда Қызылорда полициясы белсендінің үйінде тінту жүргізіп, қарт анасы мен баласының көзінше күштеп ұстап алып кеткен еді. Оның үстінен желідегі жазбаларына байланысты «алауыздық қоздыру» бабы бойынша қылмыстық іс қозғалған. Содан бері ол қамауда отыр. Белсенді желіде жаңа Конституция жобасына қарсылық білдіріп, саяси тұтқындарға бостандық талап еткен. Ол бұған дейін де саяси қудалауға тап болған. Марат Жыланбаевты қолдаған жазбасы үшін 10 тәулікке отырып шыққан еді.