Алматыда сот «ҚазТАГ-тың» бас редакторы Әмір Қасеновқа қатысты бұлтартпау шарасын өзгертті
Алматыда сот «ҚазТАГ-тың» бас редакторы Әмір Қасеновқа қатысты бұлтартпау шарасын өзгертті. Үйқамақтың орнына қамауға алу туралы шешім шығарды. Бұған журналистің маусымдағы Президентке жолдаған үндеуі себеп болған. Қасеновке былтыр әлеуметтік желіге шығуға, интернет пен байланыс құралдарын пайдалануға тыйым салынған болатын. Сот журналист үйқамақ талаптарын бұзды деп танып, оны қамауға алу туралы қаулы шығарды. Бұған дейін 14 маусымда Әмір Қасеновты үйқамақта ұстау мерзімі аяқталған еді. Журналист жәбірленуші тараппен келісімге келуіге, кешірім сұрауға дайын екенін жеткізді. Бірақ кінәсін мойындамайтынын, кәсіби міндетін атқарғанын мәлімдеді. «Мен әрқашан заңға сенетінмін және оны қатаң ұстанатынмын. Бірақ мені заңсыз соттауға, тірідей соттауға жол бермеймін. Бұл сот емес, бұл — озбырлық. Осы сәттен бастап мен толықтай аштық жариялаймын. Бұл бопсалау емес. Бұл — осындай әділетсіздікке деген менің ең соңғы уәжім», — деді Қасенов сот залында қамауға алынар алдында. 2025 жылы желтоқсанда ҚазТАГ басшысы Әсет Матаев пен ҚазТАГ агенттігінің бас редакторы Әмір Қасенов «көрінеу жалған ақпарат таратты» деген күдікке ілінді. Содан бері журналист 6 ай бойы үйқамақта отырды. Агенттіктің үстінен Freedom Finance компаниясы арыз түсірген. ҚазТАГ бұл қылмыстық істі сөз бостандығын шектеу әрекеті, қысым көрсету деп бағалады. видео: Elmedia / Facebook