Атыраулық журналист Олеся Вертинская қысым көріп, отбасына қауіп төніп тұрғанын мәлімдеді
«Дорожный контроль» журналисі Олеся Вертинская жергілікті полициядан қысым көріп, отбасына қауіп төніп тұрғанын мәлімдеді. Оның сөзінше, Атырауға жаңа полиция бастығы келгеннен кейін журналист қудалауға ұшыраған. Олеся Вертинская мұны қызметімен байланыстырады. Журналист бұған дейін өңірдегі полиция қызметкерлерінің заңсыз әрекеттері туралы материалдар жариялаған. Сондай-ақ, Вертинская алаяқтарға алданған, зардап шеккендер мәселесін көтерген. Осыдан кейін журналистің өзіне қарсы «жала жабу» бабы бойынша әкімшілік хаттамалар толтырылған. Журналист іс біржақты қаралғанын айтады. Сондай-ақ, полиция журналисті үй жанында торуылдап, заңсыз ауласына кіріп, қыспаққа алған. Бірақ бұл жағдай туралы да журналистің арызы қарастырылмаған. Осыған байланысты Олеся Вертинская отбасының қауіпсіздігіне алаңдап, бұл жағдайға қоғамдық резонанс тудыруын сұрады. Олеся Вертинская — Атыраулық журналист, Қаңтар оқиғасы кезінде полиция бөлімшесінде көрген азаптаулары жайлы шындықты айтқан. Қызметі мен азаматтық белсенділігі үшін бірнеше рет қудалауға тап болған. 2022 жылы тіпті шабуылға ұшырап, соққыға жығылды. Видео: Вадим Борейко