Агросарапшы, азаматтық белсенді Алмасбек Садырбайдың соты қатаң шектеулермен өтіп жатыр
Бұл туралы оның адвокаты Анар Құсайын мәлімдеді. Оның сөзінше, айыпталушының қорғалу құқығы мен сотқа тікелей қатысу құқығы, сондай-ақ адвокаттың кәсіби қызметін атқару мүмкіндігі өрескел бұзылған. 29 қазан Қонаевта өтіп жатқан сотта судья қылмыстық іс материалдарын зерттеу кезінде тек құжаттардың атауын оқып, адвокаттарға оған қатысты ауызша пікір айтуға тыйым салған. Тек жазбаша ұсынуды талап еткен. Адвокат бұған қарсылық білдіргенде, судья оның сөзін тыңдамай, микрофонын өшіріп тастап, ескерту жасаған. Алмасбек Садырбай қорғаушысының құқығы шектелгеніне наразылық білдіргені үшін «тәртіп бұзды» деген айыппен сот залынан қуылған. Анар Құсайын басты сот талқылауына айыпталушының міндетті түрде қатысуы керек екенін айтып, сотты тоқтатуды талап еткен. Бірақ судья отырысты айыпталушының қатысуынсыз ары қарай жалғастырған. Алмасбек Садырбай — агросарапшы, кәсіпкер, шаруалар мәселесін көтеріп, ауыл шаруашылығына қатысты заңсыздықты ашық сынап жүрген үшін азаматтық белсенді. Ол 2024 жылы қарашада ақша жымқырды деген күдікпен ұсталды. Содан бері Алматы облысы Қонаев қалалық сотында қамауда отыр. Онымен бірге тағы алты адам айыпталған. Қамауға алынбас бұрын Алмасбек Садырбай желіде ел президенті Тоқаевтан араша сұраған еді. Кәсіпкер өзіне жалған жала жабылып, «агро олигархтар» тарапынан қысымға ұшырап жатқанын мәлімдеген.