Қытайда қамалған күйеуіне бостандық талап етіп жүрген Гүлдария Шеризат өзі түрме жазасына кесілді

⚡️Ол 5 жылға бас бостандығынан айрылды. Кәмелет жасына толмаған баласы болғандықтан, жазасы бір жылға шегерілді. Гүлдария Шеризат — Қытайға қарсы наразылық білдіргені үшін сотталған 19 адамның бірі. Ол былтырдан бері қыздарымен бірге әділдік іздеп, шырылдап келеді. Күйеуі Әлімнұр Тұрғанбай Қытайға жұмысқа кетіп, шекарада ұсталған. Содан бері одан хабар жоқ. Гүлдария Шеризат Қазақстан билігінен көмек сұрап, бірнеше рет наразылық акциялар мен пикетке шықты. Сол үшін айыппұл арқалады. Туыстарына келіп жеткен соңғы мәлімет бойынша Әлімнұр Тұрғанбай Қытайда «түзету лагерінде» отыр. Ол 2,5 жылға сотталған болуы мүмкін. Әлімнұр Тұрғанбай 2017 жылы ресми Қазақстан азаматтығын алған. Гүлдария Шеризат үкіммен келіспейді. Ол сот үкімін заңсыз деп бағалады. Еске салсақ, Талдықорғанда сот «Атажұрт» белсенділерін Қытай туы мен төрағасы Си Цзиньпиннің суретін өртегені үшін кінәлі деп танып, 5 жылға түрме және шартты жазаға кесті. Айыпталушыларға қоғамдық және саяси іспен айналысуларына тыйым салды.