Журналист Асхат Ниязов Алматы тауларындағы орманды жойып жатқан сұмдық көріністі көрсетті

Видеодан шатқалда ауыр техниканың жүргенін, ағаштарды жаппай отап тастағанын көруге болады. Журналист алаңнан құрылыс паспортын таба алмағанын және құрылысшылардан мардымды жауап ала алмағанын жазды. «Не салып жатқанын өздері де білмейді», - деді журналист. Алматы әкімдігінің ресми мәліметінше, Бұтақты және Кімасар шатқалында тау кластерінің инфрақұрылымын дамыту көзделген. Мұнда аспалы жол станциясы, тамақтану, құрал-жабдықтарды жалға беру және туристік кеңістік салынбақ. Бұған дейін Бұтақты шатқалында құрылыс салдарынан 2,8 мың жылдық археологиялық ескерткіштің бір бөлігі жойылған еді. «Қазақстан – петроглифтер елі» қауымдастығының мәліметінше, мұнда ерте темір дәуіріне жататын көне қоныс болған.