Алматыда «Гиперборей» арнасының авторы Вадим Борейконың сотында жедел тәртіппен жарыссөз өткен

Судья істі қарауды аяқтап, 12 қараша шешім шығармақ. Жарыссөз өтетіні туралы Борейконың адвокаттарына алдын ала ескертілмеген. «Etude-Ybyrai» құрылыс компаниясы журналисті «компания беделіне нұқсан келтірді», «жалған ақпарат таратты» деп айыптап отыр. Компания оның Premier тұрғын үй кешені туралы видеолары құрылыс жұмыстарының тоқтауына себеп болды дейді. Соған байланысты журналистен ақпаратты теріске шығарып, 71 млн теңге шығынды өтеуді талап еткен. Вадим Борейконың қорғаушылары соттан талап-арызды толық қанағаттандырмауды сұрады. Олар талаптың негізсіз екенін, журналистің материалдары мен талап етілген шығын арасындағы байланыс дәлелденбегенін айтты. Адвокат Жанна Уразбахова тұрғын үй кешенінің құрылысына қатысты басқа да бірнеше БАҚ жазғанын, бірақ сотқа тек Вадим Борейко тартылғанын атап өтті. Ол журналист мемлекеттік орган өкілдерінің (оның ішінде, бұрынғы қала әкімі Ерболат Досаев бар) ресми мәлімдемелері мен қала тұрғындарының шағымына сүйенгенін алға тартты. Жанна Уразбахова соттан әділдікті және журналистке қатысты шектеуді алап тастауды талап етті. Еске салсақ, Вадим Борейко — тәуелсіз журналист, «Гиперборей» YouTube-арнасының авторы. Сәуірде оның барлық шотын, зейнеткерлік картасын да бұғаттап тастады. Онымен қоса өзіне қатысты сот процесі жайлы пікір білдіруіне тыйым салынды. видео: Respublica.kz | Youtube